Bay tit paw...

G8, G30 youn pa sifi
pou chanje sitiyasyon Ayiti
kandida move pèdan ini
chak fwa yo vle neye AYITI

se pa jodia nap kraze brize
pran lari san koz,manifeste
voye Wòch rele anmwe,mete dife
nom ayiti toujou nan lis sou devlope

Se pa jodia animal politik
san okenn santiman patriotik
ap rann sitiyasyon peyi a pi kaotik
li lè poun chanje politik,chanje taktik

Sa fè lontan nap chèche chanjman
nou bat tenèb pote lanp tèt gridap
men'n pa ka jwenn chimen devlopman
akoz politisyen abolocho kap zoukoutap

Kap zoukoutap nan konstitisyon nou
Yo zoukoutap nan chanm depite,a senatè yo zoukoutap nan primati e andan palè
Yo fèl nan tribinal,yo fèl sou nou

Pèp la tounnen yon tanbou de (2) bonda
aprè'l fin rele viv, se yo ki rele aba
yo di se pèp ki bay pouvwa
pouki se yo ki toujou pran kout ba?

Pèp la toujou pote lanp pou rara
ni goch,ni dwat youn pa ka fè diferans
ni je sèch,ni je vèt pa wè pèp nwa sa
kap dodo meya nan soufrans

Kiyès ki diferan?
kiyès ki vle chanjman?
sou kiyès pèp la ka konte?
kiyès ki pa g'on kou ki byen monte?

<<Roosevelt Cantave>>